2ª Achega

Anicarse: Agacharse dobrando os xeonllos e apoiando o peso do corpo sobre as pernas. Por esta zona tamén se emprega aniñarse ou encrequenarse. 

 Rubir: Subir agatuñando por unha superficie vertical (gabear)

 Esfurricarse: Estar descomposto (de aí que figuradamente se empregue co significado de ter moito medo, ata o punto de irse por si)

 Espullas: Excrecencia benigna, pequena, arredondada e escura, que se forma na pel

 Maniotas: Dor muscular que se sente nalgunha parte do corpo, especialmente nas pernas, a causa do exercicio físico prolongado

 Cambras: Contracción espasmódica e dolorosa dun músculo

 Carapola: Cobertura seca e dura das feridas no periodo de curación

 Freganzo: Anaco de esparto ou doutro material áspero que se usa para frega-la louza.         

 Rolla: Este substantivo serve para designar varias realidades. Así, podemos empregalo tanto para referírmonos ó tapón dunha botella, pipote, etc. como, por exemplo, ó mulido en forma de roda que se pon na cabeza para levar un peso         

 Cortiza: Aínda que con este substantivo nos podemos referir á capa exteiror que cobre o tronco e as ponlas das árbores, tamén fai referencia á casca da sobreira, substancia coa que poden facerse as rollas

 Lampantín: Dise de quen é pouco amigo de traballar ou de quen como moito. Tamén se emprega para referírmonos á persoa que fala ou actúa con desvergonza óu que é pícara e astuta.

 Fostró:Termo empregado nalgunhas zonas para referirse a unha persoa que camiña ou se move de forma torpe, sen ritmo, pero tamén designa persoas cun aspecto desgairado debido á roupa que visten.

Published in: on Novembro 30, 2007 at 2:55 pm  Deixar un comentario  

1ª achega

Acebillar: Aínda que non aparece recollida nos dicionarios, esta palabra emprégase nalgunhas zonas de Galicia co significado de apurar, é dicir, dar ou meter présa. Na zona de Salcedo utilízase con este significado o verbo alambrar.  

Almadraque:  palabra actualmente moi pouco empregada e que fai referencia á almofada  

Andar ó leu: Andar á intemperie, ó frío, con pouca roupa.  Axóuxere: Esfera oca que pode ser de distintos materiais e que leva dentro unha 0u máis boliñas soltas para que emitan son ó axitalas.  

Cear: Ademais de existir como verbo que significa inxerir un determinado alimento na comida, xeralmente a última do día, que se fai polo serán ou pola noite tamén temos na nosa lingua o verbo cear co significado de recuar, andar ou moverse cara a atrás.  

Encetar: Este verbo pode significar empezar a gastar algo que estaba enteiro (especialmente referido á comida “enceta-lo xamón ou a bola de pan) pero tamén se utiliza cando falamos de que unha ferida se infecta.  

Galdrumada: Comida mal feita, con moitas cousas mesturadas e de mal aspecto aínda que nalgunha zona non ten este matiz negativo e emprégase para facer referencia a calquera tipo de doce ou alimento que leve azucre.

 Papaventos: xoguete que consiste nuhha armazón lixeira que sostén estirado un papel ou unha tea e leva colgada unha cola tamén de tea ou papel. Este xoguete elévase no aire aproveitando as correntes de vento e queda suxeito por un cordel. 

Published in: on Novembro 16, 2007 at 3:07 pm  Deixar un comentario